БИШКЕК, 14-июл. — Sputnik. Кыргызстанда келе жаткан аптада күн ысык болгону менен жаан-чачын себелей турганын Кыргызгидромет агенттиги жумалык божомолунда билдирди.
14-июлда Ысык-Көл, Нарын облустарынын көпчүлүк аймактарында, Чүй, Талас, Ош, Жалал-Абад, Баткен облустарынын кээ бир райондорунда өткүн өтүп, күн күркүрөшү күтүлөт.
15-июлда Ысык-Көл, Нарын дубандарынын кээ бир райондорунда өткүн өтөт. Калган аймактарда жаан-чачын күтүлбөйт.
18-июлда күндүз Ысык-Көл, Нарын облустарынын айрым жерлеринде, Чүй облусунун кээ бир тоолуу райондорунда өткүн өтөт. Калган аймактарда жамгыр жаабайт.
19-июлда күн ачык болот. 20-июлда тоолуу райондордо өткүн өтүп, абанын күндүзгү температурасы бир аз төмөндөйт.
Бишкек жана Ош шаарларында 14-16-июль күндөрү күн ачык болот. Батыштан соккон шамалдын ылдамдыгы секундасына 4-9 метрге чейин жетет. Эс алуучулардын уюгу болуп турган Чолпон-Ата шаарында 14-15-июль күндөрү өткүн өтүп, күн күркүрөшү күтүлөт. 16-июлда батыштан соккон шамалдын ылдамдыгы секундасына 4-9 метрден 15-20 метрге жетиши күтүлөт.
