Бүгүнкү күндө эл жашоосунун басымдуу бөлүгүн интернетте, анын ичинде социалдык тармактарда өткөрөт. Көптөр андан көз каранды болуп калганы да байкалат, жада калса айрым аракеттерине "соцтармактагы достору кандай реакция кылар экен" деп жүрөкзаада да болот. Кээде жашообуз ушул жактагы лайк жана комментарийлер менен көзөмөлдөнүп калгандай элес калтырат.
Бул нерседен биздин аткаминерлер да четте калган эмес. Кээде дал ушул соцтармак алардын ишин жөнгө салып коёт. Sputnik агенттигинин кабарчысы социалдык тармактарга көз жүгүртүп, мамлекеттик кызматкерлер менен саясатчылардын "желедеги жашоосун", кимиси кимге катталганын карап көрдү. Негизинен алар чет элдик саясатчылардын, өз кесиптештеринин, мамлекеттик органдардын жана жалпыга маалымдоо каражаттарынын баракчаларын окушат экен.
Президент Сооронбай Жээнбеков
Сооронбай Жээнбековдун Twitter баракчасы верификацияланган эмес, башкача айтканда, каттоо эсебинин жекелиги тастыкталган эмес. Мамлекет башчынын баракчасына 952 киши катталган.
Сооронбай Жээнбековдун биринчи твити 2017-жылдын 24-майында жарыяланган. "Менин расмий аккаунтума кош келиңиздер!" — деп жазган президент. Мамлекет башчынын баракчасында жалпы 55 жазуу бар, ал негизинен жолугушуулары туурасында бөлүшөт.
Айтмакчы, президенттин Facebook баракчасын барактагандар көбүрөөк, аны 3072 киши окуйт. Билдирүүлөр дээрлик күн сайын жарыяланат.
Сооронбай Жээнбековдун Instagram баракчасы да тастыкталган эмес. Мамлекет башчысына 223 киши катталган, президент өзүнүн басма сөз катчысы Толгонай Стамалиеванын жана Кыргызстандын мурунку президенти Алмазбек Атамбаевдин баракчасына көз салат.
Кыргызстандын мурдагы президенти Алмазбек Атамбаев
Алмазбек Атамбаев акыркы твитин 2013-жылы, катталгандан туура бир жылдан соң жарыялаган.
Анын баракчасы да тастыкталган эмес. Мамлекетибиздин мурдагы башчысы "Кудай буюрса, жакшы жашоого акчабыз да болот!" — деп жазган соңку твиттеринин биринде.
Баракчаны 393 киши окуйт, Атамбаев өзү Түркиянын мурдагы президенти Абдуллах Гүл, Казакстандын улуттук коопсуздук комитетинин башчысы Карим Масимовдун, Россиянын премьер-министри Дмитрий Медведевдин жана Кремлдин расмий жаңылыктарын окуйт.
Алмазбек Атамбаевдин Instagram баракчасында 778 жазуу бар, 155 миңден ашуун киши катталган, бирок анын расмий баракчасы да тастыкталган эмес. Мурдагы президент КСДПнын, мурунку өкмөт башчы Сапар Исаковдун жана Кыргызстандын президенти Сооронбай Жээнбековдун баракчаларын окуйт.
Премьер-министр Мухаммедкалый Абылгазиев
Премьер-министр Instagram айдыңында жалгыз Кыргызстандын президентинин баракчасына гана катталган. Ал эми өкмөт башчынын жазгандарын дээрлик 40 миң киши окуйт. Баса, аткаминерлердин арасында жалгыз Мухаммедкалый Абылгазиевдин Instagram баракчасы верификацияланган.
Бишкек мэри Азиз Суракматов
Быйыл январда социалдык медианын Instagram бутагында Азиз Суракматов да катталган. Анын баракчасы тастыкталган эмес, катталгандардын саны да болгону — 665. Бишкек мэри өзү жаңылыктарды жана "Бишкекасфальтсервис", Троллейбус башкармалыгы, Бишкек башкы архитектурасы, "Тазалык", Бишкек жашылдандыруу, "Бишкек жарык берүү" өңдүү муниципалдык ишканалардын баракчаларын калтырбай окуйт.
Андан сырткары, Азиз Суракматов президенттик аппарат жетекчисинин биринчи орун басары Алмаз Кененбаевдин, КР премьер-министри Мухаммедкалый Абылгазиевдин, ЖК депутаты Элвира Сурабалдиеванын, Бишкек шаардык кеңешинин төрагасы Жаныбек Абировдун баракчаларына катталган. Ошондой эле Колумбия округунун мэри Мюриел Баузер жана Москва калаасынын башчысы Сергей Собяниндин профилдерине көз салат.
ЖК төрагасы Дастан Жумабеков
Спикердин Facebook тармагында гана баракчасы бар. Ага 1 223 адам катталуу.
Вице-спикер Мирлан Бакиров
Бакировдун Facebook тармагында төрт баракчасы бар. Анын үчөө жеке болсо, бирөө бизнес жүргүзүүгө арналган. Аккаунттарынын бирине Сары-Челек коругунда эс алып жүргөн сүрөттөрүн жүктөгөн.
