БИШКЕК, 14-июн. — Sputnik. Президент Сооронбай Жээнбеков ШКУ саммитинде сүйлөп жатып, уюмга мүчө болгон мамлекеттердин коопсуздугуна коркунуч алып келчү экономикалык кылмыштар тууралуу айтты.
"Эл аралык мүнөздөгү экономикалык кылмыштар бар. Адатта алар баңгизат жүгүртүү, аткезчилик жана акчанын изин жашыруу менен байланыштуу. Жыйынтыгында бул нерселер мамлекетке коркунуч жаратат", — деди ал.
Жээнбеков ШКУнун алкагында экономикалык кылмыштар менен күрөшчү орган түзүүнү сунуштады.
ШКУга Кыргызстан, Россия, Казакстан, Өзбекстан, Тажикстан, Индия, Кытай, Пакистан мамлекеттери мүчө. Ал эми Белоруссия, Афганистан, Монголия жана Иран байкоочу макамына ээ.
