БИШКЕК, 20-май — Sputnik. Жол кыймылы коопсуздугун камсыздоо башкы башкармалыгы жакында Акыркы коңгуроо боло турганын эскертип, ата-энелер менен мектеп бүтүрүүчүлөрүнө кайрылды.
Анда Акыркы коңгуроо — бул балдардын майрамы экени, ал арак-шарап, баңгизат жана укук бузуу менен коштолбошу керектиги жазылган.
ЖКККББ эң биринчи кезекте ата-энелерге кайрылып, балдардын коопсуздугу биринчи кезекте алардын мойнунда экенин белгилеген.
"Салтанаттуу иш-чаралар өтүп жатканда жана андан кийин да балдардын жүргөн жерин, кимдер менен басып-турганын көзөмөлгө алыңыздар. Алардын ичимдик ичип, баңгизаттарын колдонуп коомдук тартипти бузуусуна жол бербеңиздер", — деп айтылат кайрылууда.
Милиция кызматкерлери балдардын ден соолугуна жана өмүрүнө коркунуч жаратпоо үчүн бардык аракеттерди көрөрүн белгиледи.
Быйыл Акыркы коңгуроо салтанаты өлкөдөгү мектептин баарында 25-май күнү саат 9.00дө башталат.
