БИШКЕК, 12-апр. — Sputnik. Жогорку Кеңештин депутаты Нурбек Алимбеков Кыргызстанда бирден көп турак жайга ээлик кылгандарга башка салык киргизүү керектигин парламентте айтты.
Бүгүн, 12-апрелде, өкмөт Жогорку Кеңештеги көпчүлүк коалицияга жасаган иштери боюнча отчет берип жатат.
Эл өкүлү Мамлекеттик салык кызматынын башчысы Теңизбек Абжапаровга кайрылып, салык боюнча мыйзам долбоору буга чейин Жогорку Кеңешке келип, бирок бир-эки добуш жетпей калып кайра артка кайтарылганын айтты.
"Германияда экинчи турак жайың болсо, салыктын башка түрү салынат экен. Биз да ошондой нерсени киргизишибиз керек. Бир адамдын башында ондогон, жүздөгөн батирлер бар, өзүңөр көрүп турасыңар", — деди депутат.
"Колдоп беребиз. Каршы чыккандар болсо, алар кимдер экенин элге жарыялайбыз", — деди ал.
Депутат, мындан сырткары, кыймылдаткычынын көлөмү чоң болгон жаңы автоунааларга да салыкты көтөрүү керектигин белгиледи.
