Бишкек шаарында жүргүнчүлөрдү тейлеген жалпысынан 43 маршруттук фирма, 10 автобустук, 10 троллейбустук каттам бар. Бул тууралуу Гуля Алмамбетова Sputnik Кыргызстан радиосунун "Ачык кеп" таңкы эфиринде маек куруп жатып билдирди.
Анын айтымында, маршруттук такси айдоочулары тиешелүү документтерде "маршруттук такси" деп жазылып калгандыгы үчүн жүргүнчүлөрдү каалаган жерден алууга укугу бар деп эсептейт.
"Маршруттук каттамга чыккан кичиавтобустар тиешелүү мыйзамдарда "маршруттук такси" деп көрсөтүлүп калгандыгы үчүн алар аялдамадан сырткаркы жерлерде токтоп жүргүнчү алууга, экинчи сызыктагы жолдон бурулууга укугу бар деп эсептеп, шаар бийлиги менен талашып-тартышып келишет. Эгер ошол мыйзамдарда "маршруттук такси" эмес, "маршруттук бус" деп көрсөтүлгөндө мэрия алардан автобус, троллейбустардай эле жол эрежелерин сактоону талап кыла алмак. Мындан сырткары, эл ташыган кичиавтобустардын тазалык нормаларын сактоосун да ушул эле аталыштын айынан талап кыла албай жатабыз. Акыркы төрт жылда маршруттук таксилердин айдоочулары менен шаар мэриясы күндө, кээде күнүнө эки ирет тегерек столго чогулуп жатат. Талкуу ушул эле айдоочулардын жол эрежелерин сактоосу, тыгын жаратпоосу боюнча жүрөт", — деди Алмамбетова.
Ал эгер шаар жүргүнчүлөрү маршруттук таксинин айдоочусу мыйзам бузган учурларга күбө болсо, 185 кыска номерине чалуусу керектигин кошумчалады.
