БИШКЕК, 15-янв. — Sputnik. Москвада КР ИИМинин Россиядагы өкүлчүлүгү менен биргеликте кылмыштуу топтун мүчөлөрү кармалды, алардын бири карактоо боюнча издөөдө жүргөн. Бул тууралуу Ички иштер министрлигинин маалымат кызматы билдирди.
Ага ылайык, аталган өкүлчүлүккө 2018-жылдын июль айында "Москва шаарында жана Москва облусунда Кыргызстандын жарандарынан түзүлгөн белгисиз адамдардын тобу кыргызстандыктарга ыдык көрсөтүп жатат" деген маалымат түшө баштаган.
"Жогоруда көрсөтүлгөн кылмыштуу топ өз мекендештеринен акча талап кылып, Москва шаарынын жана Москва облусунун аймагында ар кандай оор кылмыштарды жасап жүрүшкөн. ИИМдин өкүлчүлүгү 2018-жылдын июль айында кылмыштуу топко тиешеси барлардын аты-жөнүн тактаган. Алынган маалымат боюнча кылмыштуу топту криминалдык чөйрөдө "Кароочу" деген лакап менен таанылган Ош облусунун 1986-жылы туулган Р.М. аттуу тургуну башкарып келген", — деп айтылат маалыматта.
ИИМдин Криминалдык милиция кызматынын маалыматында ал уюшкан кылмыштуу топтун активдүү мүчөсү катары каттоодо турат жана жасаган оор кылмышы үчүн издөөгө алынган.
"2013-жылы ал башка адамдар менен Бишкек шаарынын Ленин районунун аймагында каракчылык жасап, тергөө органдарынан жашырынып жүргөн. 2019-жылдын 11-январында ИИМдин өкүлчүлүгүнүн Россия ИИМдин Башкы башкармалыгынын Москва шаары боюнча кызматкерлери менен чогуу аталган кылмыштуу топту кармоо иш-чаралары жүргүзүлгөн. Алардын ичинде криминалдык дүйнөдө "Кароочу" макамы бар Р.М. аттуу жаран да болгон", — деп айтылат маалыматта.
Азыркы учурда кармалган кылмыштуу топтун башка дагы иштерге тиешесинин бар-жогу такталууда жана аталган топтун башка мүчөлөрү аныкталууда.
Учурда аларды Минск конвенциясына ылайык, өз өлкөсүнө экстрадициялоо маселелери чечилип жатат.
