БИШКЕК, 17-дек. — Sputnik. ЦСКА футбол клубунун жарым коргоочусу Илзат Ахметов "Первая пятерка" сыйлыгына татыганын РИА Новости агенттиги жазды.
Аталган улуттук сыйлык Россия чемпионатынын жыл ичиндеги мыкты жаш футболчусуна берилет. Аны аныктоо анкеталык сурамжылоо аркылуу өтүп, футбол мекемелеринин жетекчилеринин, башка машыктыруучулардын, ардагерлер жана алдыңкы ЖМКлардын журналисттеринин пикири эске алынат.
Ахметов бул сыйлыкка татыганы үчүн абдан кубанычта экенин айтты.
"Койгон пландарды ишке ашырып, алдыга жылууга мүмкүнчүлүк болгонуна кубанычтамын. Машыктыруучу штабга жана жалпы ЦСКАга ырахмат. Мени колдогондордун бардыгына ыраазымын. Мындан ары да алдыга жылып, сыйлыкка татыгым келет, бирок командалык байге менен комнадалык оюн биринчи орунда турат. Алдыда жасай турчу көптөгөн иш бар", — деди ал.
Сыйлоо аземи дүйшөмбү күнү Москвадагы ресторандардын биринде өтүп, Ахметов чыгыш ханзаадасынын образында кийинип келген. Иш-чарада футболчунун атасы Толгок, биринчи машыктыруучусу Владимир Александров, Юрия Коноплева атындагы академиянын машыктыруучусу Сергей Никитин жана Ринат Билялетдинов жана башкалар болду.
"Илзат биздин академияга үчүнчү класста келген. Ал учурда биздин милдет мыкты оюнчуларды таап, команда түзүү болчу. Ал таланттуу бала экенин ошондо эле байкагам. Аны Россияга алып келүү керектигин айткам. Төртүнчү класста бардык документтерди тууралап, ал биздин академиянын курамына расмий түрдө кабыл алынды", — деди Никитин.
