БИШКЕК, 20-сен. — Sputnik. Борбор калаада ымыркайларды 1000 долларга жана андан да кымбат сатышкан. Бул тууралуу ИИМдин тергөө кызматы башкармалыгынын начальнигинин орун басары Азиз Нурбеков бала сатты делген дарыгерлердин иши боюнча маалымат берип жатып билдирди.
Милиция бала сатууга шектүү деп сегиз гинекологду кармаган. Алардын төртөө учурда тергөө абагында. Бул боюнча маалымат коомчулук арасында резонанс жаратып, кыргызстандыктарды тынчсыздандырган.
"Ымыркайларды 1000 доллардан жана андан да кымбат сатышкан. Учурда тергөө иштери жүрүп жаткандыктан мындан башка эч нерсе айта албайбыз. Иликтөө соңуна чыккандан кийин толук маалымат берилет", — деди Нурбеков.
Кармалган сегиз дарыгерге балдарды сатуу боюнча үч кылмыш иши боюнча айып тагылууда.
Ыкчам-иликтөө иштеринин жүрүшүндө айрым дарыгерлер мыйзамсыз негизде аборт жасап, шарты жок жерден төрөт кабыл алып, ымыркайларды сатып жүрүшкөнү маалым болгон.
Учурда тергөө абагында жаткан төртөөнө Кылмыш кодексинин 124 (адам сатуу), 116 (мыйзамсыз аборт кылуу) жана 350-беренелер (жасалма документтерди даярдоо, колдонуу) боюнча кылмыш иши козголду.
