БИШКЕК, 21-июн. — Sputnik. Жогорку Кеңештин жыйынында "Республика — Ата-Журт" фракциясынан депутат Руслан Казакбаев ири интернет ресурстарына салык салууну сунуштады.
Анын айтымында, Facebook, Google, Twitter жана Instagram сыяктуу сервистер коммерциялык уюмдардан жарнама үчүн миңдеген долларларды алып келет.
"Эксперттер билдиргендей интернет ресурстар салык төлөбөгөндүктөн биз 500 миллиондон 1 миллиард долларга чейин жоготуп жатабыз. Дээрлик бардык коммерциялык банктар жарнама үчүн акча беришет, бирок интернет компания өзүнүн өлкөсүнө гана салык төлөйт", — деди эл өкүлү.
Казакбаев Россиянын тажрыйбасын колдонууну сунуштады. Аталган өлкөдө 2012-жылдан бери интернет ресурстары салык төлөп келет. Эл өкүлүнүн айтымында, РФде жүздөгөн интернет компаниялары бар. Алар үстүбүздөгү жылдын биринчи кварталында эле эки миллиард рубль төлөгөн.
Депутат өкмөткө интернет компанияларга салык салуу үчүн мыйзам долбоор иштеп чыгуу сунушун берип, бул нерсе жарандарга эч кандай таасир бербестигин айтты.
