Өткөн күндөрдүн маанилүү делген жаңылыктарын тизмектейбиз.
Бүгүн Бишкектин бир катар жолдору жабылат, андыктан бул маалыматка көз салып коюңуз.
Себеби бүгүн футбол беттеши болуп, кыргызстандыктар менен индиялыктар күч сынашат. Андыктан кечинде стадион жактан ач-айкырык, куу сүрөөн угулса, үрпөйүп калбаңыз.
Индиялыктар кыргызстанда топ тээп жүрсө, абройлуу эле системанын кызматкери пакистандык жарандарды карактоого аракет кылды деп шектелүүдө.
Дагы бир чет элдиктер — кытайлыктардын акыркы сегиз жылда канчасы кыргыз жарандыгын алгандыгы маалым болду. Ызылдабай тургула бай болгурлар, алардын 129у биздин кандаштар экен.
Чет элде демекчи, биздин мыкты режиссерлорубуздун бири Актан Арым Кубаттын "Кентавр" тасмасы Бельгия менен Нидерландда прокатка чыкты.
Ал эми Актан мырза аз жерден таксист болуп кете жаздаптыр.
Сакурага суктанып жатабыз, бирок Кыргызстанда да маанайды көтөргөн, көрүп жетишип кала турган сулуулук бар.
Кадимкидей кармаш. Байбичелер чалышып, багелектен алышып… күрөшкө түштү.
Ааламда дегенибиз менен бизге деле тиешелүү. Дүйнөдө көпчүлүк Facebook социалдык тармагындагы баракчасын өчүрүп жатат. Бирок бизде эч ким антпесе керек.
Кемерово жүрөктү канатып турат. Тилсиз жоодон 64 киши каза болсо, анын сегизи балдар экени аныкталган. РФ президенти Владимир Путин каргашалуу жерге келди.
Бүгүн эшикке кол чатырды кошо ала чыгыңыз. Синоптиктер Бишкек менен Ош калаасында нөшөрлөп жамгыр жаап, күндүн табы 15…16 градуска чейин жетерин билдирди.
Валюта наркы. Сомдун баасы долларга карата орто эсеп менен 68.06 (сатып алуу) жана 68.26 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгүсү 41.80 сом, АИ-95 үлгүсүндөгүсү 44.50 сом, ал эми дизель майы 42.50, ал эми газ 22. 70 сомдон сатылууда.
Соңку сөз. Сактансаң сактайм…
Иш аптаңыздардын ийгиликтүү болушун каалап, Нургүл Максутова
