Өз киндигин өзү кескен Шайлообек Дүйшеев. Акын тууралуу 5 факты
Өз киндигин өзү кескен Шайлообек Дүйшеев. Акын тууралуу 5 факты
Sputnik Кыргызстан
Бүгүн Кыргыз эл акыны Шайлообек Дүйшеевдин туулган күнү. Калемин колунда түшүрбөй, поэзияга башын байлаган акын, журналист 68 жашка толду. Sputnik Кыргызстан... 23.02.2018, Sputnik Кыргызстан
Бүгүн Кыргыз эл акыны Шайлообек Дүйшеевдин туулган күнү. Калемин колунда түшүрбөй, поэзияга башын байлаган акын, журналист 68 жашка толду. Sputnik Кыргызстан агенттиги үзүрлүү эмгектенип чарчабаган калемгер жөнүндө кызыктуу фактыларды сунуштайт.
Кыйынчылыкта өткөн балалык. Акын Шайлообек Дүйшеев Нарын облусунун Ат-Башы районундагы Ача-Кайыңды айылында 1950-жылы 23-февралда жарык дүйнөгө келген. Үч жашында атасынан айрылып, апасы аны чоң энесинин колуна калтырып кетет. 13 жашка чыкканда жалгыз таянар тоосу болгон чоң энеси көз жуумп, эже-жездесиникинде чоңойгон. Жаш талант үйүнөн алты чакырым алыстыкта жайгашкан мектепке жөө барып келип окуган.
Шайлообек Дүйшеев жубайы, Мухтар Өмүракунов жана Султан Жумагулов менен
Эмгек, эмгек… Окууну бүтөөрү менен аскерге кызмат өтөгөнү кетип, кичи мекенине келгенде куруучу, райондук гезитте кабарчы болуп иштей баштайт. Өз киндигин өзү кескен акын Кыргыз улуттук университетинин филология факультетинин журналистика бөлүмүн бүтүргөн. 1980-жылдан тарта "Нарын правдасы" гезитинде кабарчы, облустук телерадиокомитетинде редактор, Фрунзедеги филармонияда адабий бөлүмдү жетектеп иштеген. Өлкө эгемендүүлүк алган соң "Ала-Тоо", "Кыргызстан маданияты", "Асаба", "Агым" басылмаларында эмгектенип, курч макалаларын жарыялаган.
Поэзияга арбалган өмүр. Байдылда Сарногоев атындагы эл аралык адабий сыйлыктын лауреаты поэзияга кадам мектепте окуп жүргөндө кыздарга арнап жазган ырларынан башталганын эскерет. Өзүнүн чыгармачылык жолунда башкалардан айырмаланган кошок, дастан, поэма, лирикалык жана публицистикалык ырларын жараткан. Анын бир топ ырлары обонго салынып эл арасында ырдалууда. Учурда кара сөз менен жазылган көлөмдүү "Агындылар" чыгармасы окурмандардын колунан түшпөй окулуп жатат. Сөз баккан Дүйшеев жакында улуу жазуучу Чынгыз Айтматов жөнүндө ырын жазып бүтөрүн айтты.
Эмгекчилдиктин жемиши. Кыргыз эл акыны II жана III даражадагы "Манас" ордени менен сыйланып, КМШ мамлекеттеринин парламенттер аралык Чыңгыз Айтматов атындагы эл аралык сыйлыгын алган. Ошондой эле ал "Манас" эпосунун негизинде жазылган "Эки дөөнүн кармашы" аттуу поэтикалык чыгармасы үчүн Токтогул атындагы мамлекеттик сыйлыкка ээ болгон.
Жубайлар азыр он неберенин кучагында дөөлөттүү көз ирмемдерди өткөрүүдө
Аксакал журналист жана чоң ата. Шайлообек Дүйшеев 70 жашка жакындап калганына карабай журналистиканын казанында кайнап келет. Узак убакыттан бери "Азаттык" радиосунда "Сөз дайра", "Басма сөзгө баяндама" уктурууларын алып барып, макалаларды жазып турат. Пайгамбар жашынан өтүп калган акын байбичеси Зейне экөө үч кыз, эки уулду тарбиялап өстүргөн. Азыр алар он неберенин кучагында дөөлөттүү көз ирмемдерди өткөрүүдө.
