МОСКВА, 29-ноя. — Sputnik. Президент Сооронбай Жээнбеков КВН эл аралык бирикмесинин жетекчиси Александр Масляковго оюндун жайкы кубогун Кыргызстанда өткөрүүнү сунуштады.
Масляков 21-ноябрда ошол учурдагы президент Алмазбек Атамбаевдин жарлыгы менен кыргыз-орус достугун чыңдоого кошкон салымы үчүн "Достук" ордени менен сыйланган.
Бүгүн, шаршемби күнү, Жээнбеков Масляковго сыйлыгын тапшырды.
Масляков өз учурунда ыраазычылыгын билдирип, Кыргызстанга бир нече ирет келгенин айтты.
"Кыргызстандык жаштар КВНге ар дайым катышып келет. Бир нече жыл мурда Кыргызстанга барып, таланттуу балдар көп экенине ынангам", — деди Масляков.
Ал ошондой эле Жээнбековдун ишине ийгилик каалап, жаштарды колдоого чакырды. Ал эми Жээнбеков экс-президент Алмазбек Атамбаев ыйгарган орденди тапшыруу ал үчүн сыймык экенин белгиледи.
Масляков жакшы сунуш түшкөнүн айтып, бул жаатта ойлонуп көрөрүн билдирди.
Жээнбеков жумушчу иш сапары менен Москвага барды. Анын алкагында Россиянын лидери Владимир Путин жана өкмөт башчы Дмитрий Медведев менен жолугушат. Андан кийинки сапарын Минскиге жасап, ЖККУнун юбилейлик саммитине катышмакчы.
