БИШКЕК, 29-ноя. — Sputnik. Дача Суда авиакырсыктан каза болгондорго мемориалдык комплекс курулат. Бул тууралуу Sputnik Кыргызстан маалымат агенттигине кырсыктан жабыркаган тараптан түзүлгөн комиссиянын төрайымы Венера Шейшенова билдирди.
Эскерте кетсек, үстүбүздөгү жылдын 16-январында Түркиянын ACT Airlines компаниясына таандык Boeing 747 учагы Дача Су айылына кулаган. Кырсыктан экипаждын төрт мүчөсүн кошкондо 39 адам каза болуп, дагы 15 киши жабыркаган.
Шейшенованын айтымында, учурда бул курулуштун үстүндө жабыркагандар менен бирге өкмөт жана курулуш компаниялары иштеп жатат.
"Мен өзүм авиакырсыктан үч баламан ажырагам. Албетте бул биз үчүн айыккыс нерсе. Бирок жашоо улана берет экен. Мындан ары ал жерде кырсык болбосун, гүлдөп-өнүгүп тарыхта кала турган жер болсун деп мемориалдык комплекс куралы деп жатабыз. Буюрса, эскизин жабыркагандардан түзүлгөн комиссия мүчөлөрү түзүп, аны өкмөт колдоп, курулуш компаниялары жардам берүүдө. Азыр ал жерде жапа чеккен үйлөр да түрттүрүлүп, даярдык иштери жүрүп жатат", — деди Шейшенова.
Авиакырсыктан жабыркагандар жана каза болгондордун жакындарына түрк компаниясы тарабынан компенсация төлөнүп бүткөн. Ошондой эле өкмөт Өзгөчө кырдаалдар министрлигинин атайын эсебине түшкөн каражат ачык-айкын жана адилеттүү бөлүштүрүлгөнүн билдирген.
