Кыздын бараар жери күйөө. Ар бир ата-эне кызы бой жеткенде бир жерден орун-очок алып, жакшы жерге бүлө болсо экен деп тилейт эмеспи. Анан да кызын ала качып эмес, кыргыздын каадасын кылып куда түшүп, сөйкө салып алып кетсе деп самашат.
Уулунун тагдырын ойлогон эне. Эне байкуш баланы төрөгөндөн кийин көзү өткүчө чүрпөлөрүн канаттууга кактырбай, тумшуктууга чоктурбай бакканга аракет кылат эмеспи. Кабарчыбыз Зульфия Тургунованын ВИЧ болгон баланын энесинин тагдыры тууралуу материалын окуганда кабыргам кайышып, көзүмө жаш тегеренди.
WEF. 22-ноябрда борбор калаада өтүүчү "WEF Global 10: Улуу Жибек Жолунун баатырлары" аттуу юбилейлик турнири болот. Ага карата бир күн эрте мушкерлер маалымат жыйын өткөрүп, көз караштар таймашын уюштурушкан. Андагы эр жүрөк, жоон билек мушкерлердин бири-бирине сес көрсөткөн ирмемдерин бул жактан көрүңүздөр.
Кымбаттагандан кымбаттап. Кыргызстанда күйүүчү майдын кымбатташы күтүлүүдө, айрым түрлөрү 2 сомго чейин көтөрүлө турганын Нефтетрейдерлер ассоциациясынан билдиришти. Спирт ичимдиктерине карата акциздин баасын көтөрүү боюнча премьер-министр өкмөттүн токтомуна кол койду. Эми бул ичимдиктердин баасына да таасир этсе керек.
Өлкөдө дагы бир кымбаттаган нерсе — бул көмүр. Ош облусунда Сүлүктү көмүрүнүн баасы 12 500 сомго жетиптир. Кыш кычырап келатканда карапайым калктын чөнтөгүнө күч келбейби? Буга тийиштүү органдар жооп берди.
Наадандар. Кыргызстанда күмбөз үстүнөн сүрөткө түшкөн немис туристтери элдин каарына калып, социалдык тармакта бир топ ызы-чуу жаратты. Булар күмбөздөрдү эстелик менен алмаштырып алган окшойт.
Түштү сууга айтпайт… Президенттин маалымат жыйынында журналист Амантур Мусагулов Атамбаевдин кол саатын чечтирип алды эле, соцтармак колдонуучулары дуулдап "түш көрүп", кыялданып эле жатып калышты. Бири тойго акча сураса, Жогорку Кеңештен мандат алсам дегендер да чыкты.
Ошентип ажо Атамбаевдин да сапары карыды. Жума күндөн тарта жаңы шайланган президент Сооронбай Жээнбеков кызматка расмий киришет. Инаугурация "Ала-Арча" мамлекеттик резиденциясындагы "Энесай" үйүндө өтүп, артиллериялык залп атылат.
Валюта наркы. Сомдун баасы долларга карата орто эсеп менен 69.59 (сатып алуу) жана 69.78 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 41.50 сом, АИ-92 үлгүсүндөгүсү 38.70 сом, ал эми дизель майы 36.70 сомдон сатылууда.
Соңку сөз. Талашканыбыз сый болсун!
Аманчылык каалап, Таалайгүл Усенбаева.
