БИШКЕК, 21-ноя. — Sputnik. Чет элдик TAV Airports Holding компаниясы Кыргызстанда жаңы аэропорттордун курулушуна инвестиция салууга даяр. Бул тууралуу аталган компаниянын аткаруучу директору Мустафа Сенер премьер-министр Сапар Исаков менен жолукканда айтканын өкмөттүн маалымат кызматы билдирди.
Исаков өкмөт долбоордун алкагында кызматташууга даяр экенин жана бул жаатта ишти баштоо үчүн парламент менен кеңешүү керектигин белгилеп, депутаттар дагы колдоого алат деген үмүтү бар экенин билдирген.
Тараптар ошондой эле эки тараптуу кызматташуунун келечеги, өзгөчө эл аралык "Манас", "Ош" аэропортторун модернизациялоого акча салуу жаатын дагы талкуулашкан.
Сенер, андан сырткары, ушундай эле долбоорлор Грузия менен Македонияда да бар экенин айтып, аэропорттун абалы жакшыргандан кийин жүргүнчүлөрдүн саны дагы көбөйгөнүн маалымдады.
Өз кезегинде премьер-министр Сапар Исаков жаңы инвестордун ички рынокко жылуу-жумшак кириши үчүн керектүү болгон даярдык иштерин көрүү зарылдыгын белгилеген. Андан сырткары, аэропорттор мамлекеттин тышкы каалгасы экенин айтып, аларды замандын талабына ылайык келтирүү зарыл болуп турганын билдирди. Исаков ошондой эле мындай кадам туризмдин өнүгүшүнө да таасир береринн токтолду.
Жолугушууда тараптар биргеликте иштөө жана инвестициялык долбоорлордун планы боюнча пикир алышты.
