Ош менен Бишкекте аба ырайы бүгүн сизге аптаптуу жайды эске салышы мүмкүн. Себеби, күндүн табы 27…28 градуска чейин көтөрүлөт. Жылуураак кийинип алсаңыз, боргулданып тердериңиз турган иш.
Көчөдөн издеп, көзүмө урунта албай койдум. Бул талантты бир уккум келди эле. 52 жаштагы Орозбек Пазыловдун эл аралап ырдап, маршрутка, базарларда комуз сатып иштеп жүргөнүнө жети жылдан ашыптыр.
Бүгүн чака-челекке суу толтуруп, анан ишти көздөй сыздым. Баары бир кечигип калдым, түндө эле камдап койбой…
Кудум өзүм барып, учурашып, маектешип келгендей кудуңдадым. Элестетсеңиз, "Миссис Смит" Көчмөндөр оюнуна келип, тапанча эмес, шыпылдатып жаанын саадагын кагып жатса. Анжелина Жоли менен сүйлөшкөн Садык Шер-Нияз мырза тим англисче түш жоруйт окшойт.
Эх-хх.. Эл басы, бааңыз түштү. Кечээ Эламандын материалын окуп, ошондой болмок дедим. Эл абалын ойлобогон Эл басы… Айтайын десең сөз көп… Анын үстүнө ун кымбаттаса, убайымга карапайым калк көбүрөөк түшөт го… Бир айдан кийин дешти унчулар…
Фрунзе шаарын унута элексизби? Ал кимдин атынан коюлганын билгениңиз менен мындай сейрек сүрөттөрдү көрө элексиз го, ээ? Жок деп баш чайкаар алдында кол башчынын бул сүрөттөрүнө бир баам салып койсоңуз, ашыктык кылбайт.
Таберик сүрөт. Сейрек демекчи, мындай жарым кылым тартылган сүрөттү таптык. Тим эле, аярлап, аялуу жерге сактап кое турган элес. Асек Жумабаевдин Москвада жаркылдап ырдап жаткан учуру.
Болбойт дешти. Акырында айтарыбыз, эч качан жалгыз отуруп, тамак ичпеңиз… жаман болот. Окумуштуулар айтышты.
Валюта наркы. Сомдун баасы долларга карата орто эсеп менен 68.80 (сатып алуу) жана 68.90 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 41.90 сом, АИ-92 үлгүсүндөгүсү 39.40 сом, ал эми дизель майы 37.50 сомдон сатылууда.
Соңку сөз. Алыскы туугандан жакынкы кошуна артык деген сөз бар эле…
Жакшылык жана бейгамдык каалап, Нургүл Максутова.
