БИШКЕК, 30-сен. — Sputnik. Кыргызстанда каза тапкан израилдик турист Хилла Ливненин эгизи Ювал Ливне карындашын издөөгө катышкан жана кайгысын тең бөлүшкөн адамдарга ыраазылычык сөздөрүн өзүнүн Facebook баракчасына жазды.
"Бир нече күндөн бери татаал көз ирмемдерди биз менен чогуу баштан кечирип жаткан адамдар менен абдан жакын болуп калдык. Тилекке каршы, силерге суук кабар угузуп жатабыз, Хилла эми биз менен эмес. Суранарым, анын жагымдуу жылмаюсун эстей жүргүлө. Жаркын элеси ар дайым жүрөгүбүздө болсун", — деп жазды Ювал Ливне.
Эске салсак, Жалал-Абаддын Аксы районунда израилдик турист кыз 23-сентябрь күнү жоголуп кеткен бойдон 29-сентябрь күнү сөөгү табылган.
Жардан кулап каза тапкан туристтин сөөгүн ӨКМ куткаруучулары кечээ кечинде алып чыгып, Аксы РИИБинин кызматкерлерине өткөрүп берген.
ИИМдин маалымат кызматынан билдиришкендей, туристтин сөөгү учурда мекенине жөнөтүлө элек. Милиция кызматкерлери иликтөө иштерин жүргүзүп, кырсык азырынча кокустук деп бааланып жатканы айтылды.
