БИШКЕК, 8-сен. — Sputnik. Дейр-эз-Зор шаарындагы террорчулардын пунктуна Россия авиациясы сокку уруп, жыйынтыгында мурдагы полковник Гулмурод Халимов жок кылынды. Бул тууралуу РФтин Коргоо министрлигинин маалыматына таянып РИА Новости агенттиги жазды.
Кабарда Халимов жана дагы таасирдүү үч командир террорчулардын пунктунда жыйын өткөрүп жаткан маалда өлтүрүлгөндүгү айтылат.
Халимов карьерасын атайын даярдыктагы советтик аскерлердин катарында баштаган. Кийин тажик ОМОНунун командири, көзгө басар аскерлердин бири болгон. 2003-2008-жылдар аралыгында америкалык Blackwater аскердик базасынан атайын даярдыктан өткөн.
2015-жылдын май айынан баштап кызматка чыкпай койгон Халимов бир нече айдан кийин интернет аркылуу "Ислам мамлекети" тарапка өтүп кеткендигин жарыялаган.
Ошондон кийин тажик бийлиги Халимовду Интерпол аркылуу издөөгө алган. Ал эми АКШнын мамдепартаменти аны "Ислам мамлекетиндеги" алдыңкы фигуралардын бири катары сыпаттап, анын жүргөн жери тууралуу маалымат бергендерге үч миллион доллар сыйлык каралганын айткан.
