Япониядагы ири корпорация Кыргызстанда туунду компания ачмай болду

БИШКЕК, 5-сен. — Sputnik. Япониялык Tokyo Rope MFG корпорациясы Кыргызстанда туунду компания ачканы жатат. Бул тууралуу Кыргызстандын Тышкы иштер министрлигинен билдиришти.

Дүйшөмбү күнү Кыргызстандын Япониядагы ыйгарым укуктуу элчиси Чыңгыз Айдарбеков Tokyo Rope MFG корпорациясынын биринчи вице-президенти Казунори Сато менен жолугушту. Эки тарап буга чейин, үстүбүздөгү жылдын март айында президент Алмазбек Атамбаевдин катышуусунда өткөн сүйлөшүүлөрдү ишке ашырууну талкуулашты.

"Казунори Сато Tokyo Rope Construction корпорациясынын туунду компаниясын Кыргызстанда ачуу чечими чыгарылганын билдирди. Аталган ишкана "Tokyo Rope MFG" корпорациясынын тоо-инженердик долбоорлорун ишке ашыруу боюнча чет элдик келишимдер менен алектенет. Буга байланыштуу Сато Кыргызстандын Япониядагы элчилиги кыргыз тоо-инженерлерин ишке тартууга жардам берерине үмүт артарын билдирди", — деп айтылат маалыматта.

Айдарбеков кызматташууга кыргыз тарап даяр экенин билдирип, корпорациянын Кыргызстандын рыногуна кириши өзгөчө мааниге ээ экенин белгилеген.

Жолугушуунун жыйынтыгында эки тарап Меморандумга кол койду, ага ылайык Tokyo Rope Construction Кыргызстанда катталгандан кийин ишке тоо-инженерлерин тарта баштайт. Алар төмөнкүдөй талаптарга жооп бериши керек.

• тоо тармагы боюнча жогорку билимдүү;
• тоо шартында иштей алган 35 жашка чейинки дени сак адистер;
• англис же япон тилин билүү;
• Тоо өнөр-жай тармагында тажрыйбасы бар адам;
• Узакка созулган командировкаларга барууга мүмкүнчүлүгү барлар.

TOKYO ROPE MFG.CO., LTD. компаниясы 1887-жылы түзүлгөн. Ал жогорку технологиядагы болоттон жасалган зымдарды чыгаруу боюнча дүйнөлүк лидерге айланган.

TOKYO ROPE компаниясынын Японияда беш, Кытайда эки жана Вьетнам менен Малайзияда бирден заводдору бар.