БИШКЕК, 5-сен. — Sputnik. Өзбекстандын 20 компаниясынын өкүлдөрү Бишкекте өтө турган бизнес-форумга келишкенин Соода-өнөр жай палатасы билдирди.
Бүгүн, 5-сентябрда, Кыргызстанга Өзбекстандын президенти Шавкат Мирзиёевдин келиши күтүлүп жатат.
"Ушул күнү эки өлкөнүн Соода-өнөр жай палаталары бизнес-диалог уюштурат. Форумга катышуу үчүн курамында Өзбекстандын Тышкы экономика министрлигинин, Инвестиция боюнча мамлекеттик комитеттин жана 20 компаниянын өкүлдөрү келди", — деп айтылат билдирүүдө.
Маалыматка ылайык, коңшу өлкөнүн ишкерлери биргелешкен ишканаларды түзүүгө, анын ичинен пайдаланылган унаа дөңгөлөктөрүн кайра иштетүү, желим буюмдарды чыгаруу, Кыргызстандан көмүрдү экспорттоо жана айыл-чарба тармагында кызматташууга кызыкдар.
Кыргызстандын Соода-өнөр жай палатасынын президенти Марат Шаршекеевдин пикиринде мамлекеттердин мындан ары соода-экономикалык жактан кызматташуу бардык шарттары бар.
Учурда Кыргызстан менен Өзбекстандын ортосунда эркин соода режими иштейт.
