БИШКЕК, 28-авг. — Sputnik. Ажылык парзын аткарып жаткан кыргызстандык зыяратчылардын ден соолугун 13 дарыгерден турган атайын топ көзөмөлгө алууда. Бул тууралуу муфтият билдирди.
Кыргызстандык зыяратчылар жайгашкан мейманканалардын бардыгы бир жерде болгондуктан эки мейманканага атайын убактылуу медициналык тейлөө түйүндөрү уюштурулуп, КРдин саламаттык сактоо министрлиги тарабынан жиберилген дарыгерлер 24 саат бою өз кызматтарын көрсөтүшүүдө.
Ошондой эле кыргызстандык зыяратчылар үчүн Тез жардам кызматтары дагы уюштурулуп, ынгайлуу шарттар түзүлгөн.
"Иштөө графиги эртең менен 8:20дан кечки 20:30га чейин дем алышсыз улантылып, кайрылган жарандарды үзгүлтүксүз кабыл алуудабыз. Дарыгерлер ар кыл тармакта болгондуктан күнүгө алты дарыгер кезектешип иштеп жатабыз", — деп дарыгер Мухаметалим Турсунбаев билдирди.
Кыргызстандык дарыгерлердин айтымында, бүгүнкү күнгө чейин оор абалда кайрылгандар каттала элек.
