Open Asia Табылды Кадырбековдун эмгегин Орто Азиядагы баалуу сүрөт деп тапты

БИШКЕК, 24-авг. — Sputnik. Open Asia аналитикалык порталы Sputnik Кыргызстан агенттигинин фото кабарчысы Табылды Кадырбековдун "Таттуу кебездерди саткан апа" аттуу сүрөтүн Орто Азиядагы баалуу сүрөт деп атады.

Дүйнөлүк сүрөтчүлөрдүн күнүнө карата Орто Азиядагы фотографтардын эмгектери тууралуу макала Open Asia сайтына жарыяланды.

Анда сүрөттүн авторлору эмгектери тууралуу комментарий жазып, маңызы тууралуу айтып беришкен.

Эске сала кетсек, Кадырбековдун "Таттуу кебездерди саткан апа" аттуу эмгеги Стенин атындагы эл аралык сынакка катышкан.

Макалада кыргызстандык фотографтын сүрөт тууралуу айтып бергени жазылган.

"Ошондо аба ырайы бурганактап турган. Шеф-редактор мага сүрөттөр түрмөгүн жасайбыз, эшикке чыгып тартып кел деп жиберди. Бурганактаган карда элдин кантип жүргөнүнө, колдорун кымтылап үшүгөнүнө, кээ бирлеринин карга суктанып жатканына байкоо салып, көчө аралап жүрдүм. Ишти бүттүм деп кеткенге камынып жатып, эки колуна кумшекерден жасалган таттуу кебездерди көтөрүп алып, бульварды аралап, өйдө кетип бараткан байбичени байкап калдым. Артынан тарттым, бирок бир нерсе жетишпегенсип туруп алды. Апанын алдына чыгып, эки-үч ирет чырк эттирдим. Ал эми апа жылмайып, "ай балам, эмне тартып жатасың" деген суроосуна "эстелик үчүн" деп жооп бердим", — деген Кадырбеков.

Кийинчерээк аталган сүрөттөгү апа Жабилхан Саипова экендиги, ал 2001-жылдан бери таттуу кебез сатып иштээри анык болгон.

Open Asia сайтынын макаласында Кадырбековдун эмгегинен сырткары казакстандык, өзбекстандык жана тажикстандык сүрөтчүлөрдүн эмгектери коюлган.