БИШКЕК, 17-июн. — Sputnik. Бүгүн борбор калаанын Эски аянтында өлкөнүн Куралдуу күчтөр аскердик институтунун лейтенанттарынын салтанаттуу бүтүрүү кечеси белгиленди. Бул тууралуу Куралдуу күчтөрдүн маалымат кызматы кабарлады.
Иш-чарага өлкөнүн жогорку аскердик жетекчилиги, өкмөт өкүлдөрү, Куралдуу күчтөр ардагерлери жана бүтүрүүчүлөрдүн жакындары катышты.
Башкы штабдын башчысы Раимберди Дүйшөнбиев жаш лейтенанттарды аскердик окуу жайды аякташы менен куттуктады.
"Дүйшөмбиев мамлекеттин көз карандысыздыгын коргоодо офицерлердин орду чоң экенин баса белгилеп, Ата мекен үчүн канын-жанын аябай кызмат кылууга буйрук берди", — деп жазылат маалыматта.
Бүтүрүү кечесинин соңу лейтенанттардын аскердик урааны, салтанаттуу жүрүш менен жыйынтыкталды. Курсанттар жигиттер жана Кыргыз мамлекеттик медициналык академиясынын студент кыздары вальс бийлешти.
