БИШКЕК, 23-май. — Sputnik. Унаа өткөн жолдордун жээгинде жайгашкан мектептердин картасы түзүлдү. Бул тууралуу өкмөттүн маалымат кызматы кабарлады.
Ички иштер министрлиги тарабынан жүргүзүлгөн иликтөөлөргө ылайык, республика боюнча 547 мектеп унаа өтүүчү жол боюнда жайгашкандыгы аныкталды. Бишкек ШИИБ Кайгуул милиция башкармалыгынын жетекчиси Эркин Баев бул объектилер боюнча бардык керектүү болгон жол белгилери орнотуларын кошумчалады.
"Өлкө ичиндеги жолдордун бардыгы текшерүүдөн өтүп, жыйынтыгында кооптуу делген 300 жол аныкталды. Мындан сырткары, көчөлөрдө талапка жооп бербеген 2969 жол кесилиштери бар экендиги белгилүү болду", — деп жазылат маалыматта.
"Республикадагы 2238 жалпы билим берүү мекемелерине атайын милиция кызматкерлери бекитилди. Алар эртең менен, түшкүсүн жана кечке маал окуучулардын үйдөн мектепке, мектептен үйгө чейинки коопсуздугун камсыз кылуу боюнча чараларды көрүүдө", — деп жазылат маалыматта.
Эске салсак, Сооронбай Жээнбеков жол кырсыктарынан алдын алуу боюнча жумушчу жыйын өткөргөн. Анда республика боюнча унаа жолдо жайгашкан мектептердин жанына жол чырактарын жана ылдамдыкты азайтуучу жол тосмолорун орнотуу боюнча тапшырмалар берилген.
