БИШКЕК, 23-май — Sputnik. Бишкектеги "Дыйкан" базары 24-майдан тарта жабыларын мэриянын маалымат кызматы билдирди.
Эске салсак, шаардык мэриясынын 2017-жылдын 11-апрелиндеги "Дыйкан – Пишпек муниципалдык соода-базар комплексиндеги эреже бузууларды четтетүү жөнүндөгү" токтомуна ылайык базардын ишмердиги токтотулган.
Ленин райондук администрациясы бардык соодагерлерди кабыл алынган чечим боюнча кат түрүндө кабардар кылган.
"Базардын нефть базасына жакын жайгашуусу адамдардын коопсуздугуна коркунуч жаратып, өзгөчө кырдаалдардын болуп кетишине шарттайт. Эгер өрт чыгып кетсе базарда кошумча кирип-чыгуучу жол болбогондуктан оор жоготууларга алып келиши мүмкүн", — деп айтылат маалыматта.
"Кыргыз Темир Жолу Улуттук Компаниясы" улуттук ишканасы 2017-жылы 22-майдагы чечими менен соода орундары боюнча "Лагуна групп" ЖЧКсы 2013-жылы 19-июлда түзгөн ижара келишимин жокко чыгарган.
Бишкек мэриясы шаардыктарды азык-түлүк продукцияларын "Дордой-Дыйкан" жана "Сары-Өзөн — Дыйкан" базарларынан сатып алууга чакырат.
