БИШКЕК, 18-апр. — Sputnik. Москванын Басман соту шейшемби күнү Санкт-Петербургдун метросундагы жардырууну уюштурууга шектелип кармалгандардын бири Аброр Азимовду 3-июнга чейин камакка алуу чечимин чыгарды. Бул тууралуу РИА Новости жазып чыкты.
“Тергөөчүнүн шектүүнү камакка алуу боюнча сунушу канааттандырылсын”, — деди судья Артур Карпов.
Тергөөчү сот процессинин жүрүшүндө Азимовдун кылмышка тиешелүүлүгү толугу менен далилденгенин, ал шектүүнүн өзүнүн көрсөтмөсү менен да бекитилгенин айтты.
Азимов мындай билдирүүгө макул эместигин белгиледи.
“Мен жардырууга тиешем бар деп айткан эмесмин. Терактыга менин түз эмес, кыйыр гана тиешем бар. Мага команда берилди. Террорчулукка катышып жатканымды түшүнгөн эмесмин”, — деди шектүү.
Белгилей кетсек, 3-апрелде "Сенная площадь" жана "Технологический институт" метро станцияларынын ортосунда жардыруу болгон. Акыркы маалыматтарга ылайык, андан 15 киши каза болуп, элүүдөй киши түрдүү жаракаттарды алган. Бул фактынын негизинде Россиянын Тергөө комитети теракт боюнча кылмыш ишин козгогон.
