Мындан төрт жыл мурда Нурай Өзбекстанда өткөн кыз-келиндер арасындагы таэквондо боюнча мелдеште биринчи орунду ээлеп, Азия чемпиону аталган. Кийин алган жараатына байланыштуу мелдештерге чыга албай, машыктыруучулук кесипти аркалап калган.
"Өзүм кесибим боюнча дизайнермин, бирок жүрөгүм сүйгөн иш менен алектенүүнү чечип таэквондо боюнча машыктыруучу болуп калдым. Алгач Новопавловка айылынын мектебиндеги спорт залда машыксак, балдардын саны көбөйгөндүктөн спорт зал табылып калып, аны ижарага алып иштетип жатам. Машыгууга үч жаштагы бөбөктөрдөн баштап 30га чейинки эже-байкелерге чейин келет. Аларды төрт тайпага бөлүп алып машыктырам", — деди Нурай.
"Спорт залды ижарага алып иштетем, келгендерден түшкөн акча залдын ижарасына, жашаган батириме, анан баскан-турганыбызга гана жетет. Ал эми спортчуларга жакшы шарт түзүп машыктырсам деген оюм бар, бирок ага жетпей калып жатат", — деди спортчу кыз.
Нурай машыктырган балдар-кыздар чет жактардагы турнирлерге барып, алдыңкы орундарды камсыз кыла баштады.
