БИШКЕК, 6-апр. — Sputnik. Модель Бегимай Карыбекова "Кыргызстан сулуусу — 2017" сынагынын жеңүүчүсү болгонун Sputnik Кыргызстан агенттигинин иш-чарага катышкан кабарчысы билдирди.
Жыл сайын өтүүчү бул сынак кечээ шаршемби күнү Бишкектеги ресторандардын биринде өттү. Калыстар тобунун сынынан бардыгы болуп 17 селки өттү.
Биринчи вице-мисс наамына Айчүрөк Маматемирова, экинчиге Гүлзада Исламбек кызы ээ болду. Көрүүчүлөрдүн арзуусуна Айпери Мелисбек кызы татыды.
Аталган сынактын жеңүүчүсү бүткүл дүйнөлүк "Дүйнө сулуусу" сынагына катышуу укугуна ээ болду. Эми Карыбекова ушул жылдын декабрь айында дүйнө сулуулары менен ат салышууга кам көрүшү керек.
Карыбекова — моделдик чөйрөдө бир топ ийгиликтерди багынтып келет. Мисалы, былтыр Top Model Of The World — 2016 сынагында Кыргызстандын наамын коргоп, мыкты делген жети чүрөктүн катарына кирген.
