БИШКЕК, 5-апр. – Sputnik. Санкт-Петербургдагы терактыны жасоого шектелген Акбаржон Жалиловдун сөөгүн ата-энеси тааныгандыгын РИА Новости Тергөө комитетинин төрайымы Светлана Петренкого шилтеме берүү менен жазып чыкты.
Буга чейин дайындалган ДНК экспертизасы шектүүнүн өздүгүн ырастаганы тууралуу маалымдалган.
“Акбаржон Жалиловдун ата-энеси менен сөөктү таануу процедурасы жүргүзүлдү. Алар маркум алардын баласы экенин ырасташты”, — деп билдирди Петренко.
Эске салсак, 3-апрелде Санкт-Петербургда болгон жардырууга шектелип жаткан Акбаржон Жалилов Кыргызстанда төрөлгөнүн Улуттук коопсуздук комитети ырастаган. Анын жакындары УКМКнын Ош облустук башкармалыгында сурак беришкени дагы маалым болгон. Бүгүн эртең менен шектүүнүн апасы Петербургдагы Пулково аэропортуна конгонун Россия ЖМКлары жазып чыгышты.
Белгилей кетсек, терактынын айынан 14 киши каза таап, 49 адам ар түрдүү жаракаттарды алган.
