Назарбаев менен Мирзиёев Каримовдон калган салтты улантууну чечишти

БИШКЕК, 23-мар. — Sputnik. Казакстандын президенти Нурсултан Назарбаев Өзбекстандын башчысы менен жолугуп жатып, Ташкент менен экономикалык кызматташуунун кеңейип жатканын белгиледи. Бул тууралуу Sputnik Казакстан агенттиги жазып чыкты. 

"Биз сүйлөшүүлөрдү кечээ баштадык. Чек араны ачуу, өз ара сооданы жакшыртуу үчүн көп нерсе жасалганын айттык. Бүгүн ири бизнес-форум өтүп, ага 500 ишкер катышууда. Мага жеткен маалымат боюнча анын жыйынтыгы менен бир миллиард долларлык 75 келишимге кол коюлат экен. Бул биздин тарыхыбызда биринчи жолу кездешип жаткан көрүнүш", — деди Назарбаев.

Өлкө башчынын айтымында, эки мамлекеттин ортосундагы соода 30 пайызга жогорулаган.

"Экономикалык, ошондой эле маданий-гуманитардык жаатта Өзбекстанга абдан ишенебиз. Биз дагы колубуздан келген аракеттин баарын көрөбүз", — деди Назарбаев.

Казак президенти эки өлкө ортосундагы алаканын пайдубалын өзү жана Өзбекстандын туңгуч президенти Ислам Каримов түптөгөнүн белгиледи.

"Биз экөөбүз ал салтты улантып, бири-бирибизге жардам беришибиз керек", — деди ал.

Өз кезегинде Мирзиёев эки өлкөнүн ортосундагы кызматташуу маселесине токтолуп, беш айдан бери бир топ иштер жасалганын айтып өттү.

"Сиз биздин туңгуч президентибиз Ислам Каримов менен ортодогу көпүрөнү курдуңуздар, эми алака мындан ары да чыңдала берет. Биз Казакстанды ар убак эң жакын жана эң ишенимдүү коңшу катары көрөбүз", — деди өзбек президенти.

Эскерте кетсек, Шавкат Мирзиёев Казакстанга президент катары алгачкы ирет келди. Сапардын алкагында бир катар келишимдерге кол коюлушу күтүлүп жатат.