Мураскер ким, ыя? Кыргызстанда шайлоо таза өтөрүн айткан Атамбаев мураскери ким болорун чындап билбей турганын Бельгияга барып Европа кеңешинин төрагасы Дональд Туск менен жолугуп жатып билдирди. 19-ноябрга белгиленген президенттик шайлоого талапкерлердин аты акырындык менен чыга баштады. КСДП партиясы да өз талапкерин "жакында көрсөтөбүз!" деди.
Аяз ата менен Аяз апа. Калың кар жаады деп эле мүңкүрөп отуруп калбай, кыштан рахат алып жашаган жарандарыбыз да жок эмес. Ош облусунун тургундары кардан Аяз ата менен Аяз апа жасап балдарынын маанайын көтөрүштү.
Ширетилген коляска, бийлеген "Тумар" тобу. Алты саны амандарга караганда көп аракет кылып, бир гана Кыргызстанды эмес, дүйнөнү багындырып жаткан бул балдар-кыздар учурда бийлөөгө ылайыкталган, бышык коляскаларга муктаж. Зым менен байлайбыз, зымыратып айдайбыз дегендей эле балдар-кыздар сынып калган коляскаларын атайын ширетүүчү жерге алып барып жасатып алышат. Жакында эле Америкага конкурска барып келген бийчилер чакыруу келип калса кетебиз деп турган чагы.
Кыргызстан алдыда дейт го… Түрдүү эл аралык уюмдар рейтингдерди чыгарып келет. Алардын айрымдарында Кыргызстан алдыңкы орундарга илинип калат. Heritage Foundation иликтөөлөрү боюнча Кыргызстан экономикалык эркиндик рейтинги боюнча Россия менен Өзбекстанды артта калтырыптыр. Рейтингге ишенип коюп эле отура бербей өзүбүз дагы аракет кылалы.
Өмүкенин өйдө-ылдыйы. Жогорку Кеңештеги "Ата Мекен" фракциясынын лидери Өмүрбек Текебаев Кипрге барып Курманбек Бакиев менен жолугуп келди деген маалыматты УКМК иликтеши керек деп кесиптештери айтып чыгышты. Ал ортодо "Ата Мекен" фракциясынын депутаты Алмамбет Шыкмаматов кесиптештерине "кудайды карап калп айтпайсыңарбы, ушактын казанын кайнатып жатасыңар" деп жооп кайтарды. Эмнеси болсо да жаз жакындаган сайын саясий аба ырайы чукул өзгөрүп, ыс-сыык болгону калды көрүнөт.
Жер талаш. Кыргызстанда курулуш башталса эле балдар аянтчаларын баса калмай адатыбыз бар эле. Алда немедей иштеп жаткан балдар аянтчасынын жанында курулуш иштери жүрүп, аянтчаны болгон тарабынан кысып салганын жашоочулар айтышууда. Эмне болгон балдар аянтчасы жана эмне болгон курулуш экенин бул жактан өз көзүңүз менен көрүңүз.
Валюта наркы. Бүгүн сомдун баасы долларга карата орто эсеп менен 68.98 (сатып алуу) жана 69.27 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 38.00 сом, Аи-95 үлгүсүндөгү бензин 40.90 сом, ал эми дизель майы 35.50 сомдон сатылууда.
Соңку сөз ордуна. Дем алыш күнгө пландаган иштериңер ийгиликтүү болуп, эс алып, көңүл ачканды дагы унутпагыла. Расул Үсөналиев.
