БИШКЕК, 16-фев. — Sputnik. Америкалык Heritage Foundation изилдөө борбору экономикалык эркиндиктин жаңы индексин жарыялады. Анда Кыргызстан 89-орунду ээледи.
Өлкө былтыр тизменин 96-сабында турса, быйыл жети сапка алдыга көтөрүлдү. Жыйынтыгында Кыргызстан "анчалык эркин эмес" категориясынан "салыштырмалуу эркин" категориясына өттү.
Алдыдагы бешилтикке Гонконг, Сингапур, Жаңы Зеландия, Швейцария жана Австралия кирди. Ал эми рейтингди Куба, Венесуэла жана Корей Элдик Демократиялык Республикасы жыйынтыктады.
Heritage Foundation изилдөө борбору өз иликтөөлөрүн 1995-жылдан бери жүргүзүп келет. Институттун аналитиктери экономикалык эркиндикти өлкөдөгү өндүрүшкө өкмөттүн тоскоолдук кылуусу, товарлардын, кызматтардын бөлүштүрүлүүсү жана колдонулушу боюнча карап чыгып, жыйынтык чыгарат.
Өз ыкмаларында адистер 10 индексти колдонушат. Алар: инвестиция, бизнес, соода, салык, каражат, коррупция, соода мамилелеринин эркиндиктери, өкмөттүн ишкерликке аралашпоосу жана менчик укугун коргоо.
