БИШКЕК, 27-янв. — Sputnik. Популярдуу "Игра престолов" драмалык телесериалынын жетинчи сезону көрөрмандарга качан тартууланары белгилүү болуп калганын The Independent басылмасы жазып чыкты.
Маалыматка караганда, IMDb аттуу тасмалардын ири онлайн-каталогу эпизоддордун тизмесин жана тасманын экранга чыга турган күнүн капысынан жарыялап алган. Бирок, маалымат сайттан тез эле өчүрүлгөн.
Порталга чыккан маалымат боюнча, киносериалдын биринчи бөлүгү 25-июнда көрсөтүлөт. Тасма мурдагыдай 10 эмес, алты эпизоддон турмай болуптур.
"Игра престолов" — Жорж Мартиндин "Песнь Льда и Пламени" романынын негизинде тартылган фантастика жанрындагы америкалык драмалык телесериал. Тасма дүйнөнүн жүздөгөн өлкөлөрүндө көрсөтүлүп, бир нече тилге которулган. Анын жетинчи сезону 2017-жылдын жай айларында тартууланат.
