БИШКЕК, 23-янв. — Sputnik. Ошто милиция кызматкеринин чекесин жара тепкен ырчы Алтынай Жайнакова жети жылга эркинен ажыратылышы мүмкүн. Бул тууралуу Ош ШИИБдин маалымат кызматынан кабарлашты.
Эскерте кетсек, 13-январга караган түнү саат 02.10дор чамасында Ош шаарынын Кайгуул милициясы шаардын Масалиев жана Абдыкадыров кѳчѳлѳрүнүн кесилишинде Honda Accord үлгүсүндѳгү автомашинаны алыскы чырактарын жандырып келе жаткан учурда токтоткон. Окуядан чыр чыгып, айдоочу кыз милиция кызматкеринин чекесин жара тепкен.
"Ош шаарынын 1995-жылкы тургуну Алтынай Жайнакованын үстүнөн козголгон кылмыш ишинин тергөө амалдары аяктап, Ош шаардык сотуна өткөрүлдү. Кылмыш жаза кодексинин 234-беренесинин 3-бөлүмүнө ылайык (бийлик өкүлүнө каршылык көрсөтүү) Жайнакова төрт жылдан жети жылга чейин эркинен ажыратылышы мүмкүн", — деп айтылат маалыматта.
Ошондой эле тергөөнүн жүрүшүндө Алтынай Жайнакованын чыныгы толук аты Алтынай Нематилла кызы экендиги жана ал 1989-жылкы эмес, 1995-жылы төрөлгөндүгү аныкталган.
Sputnik Кыргызстан агенттигинин кабарчысы ырчынын өзү менен байланышканда "Жайнакова" деген фамилияны сахна үчүн алгандыгын билдирди.
"Жети жылга эрктен ажыратуу мүмкүндүгү боюнча маалыматым жок. Ал эми ысымым тууралуу айтсам, документте жазылган фамилиям Нематилла кызы. Бирок сахнага чоң атамдын атын алып Жайнакова болуп чыккам. 1995-жылкымын", — деди ырчы.
Ал буга чейин өз жашын жашырбай эле айтып жүргөнүн кошумчалады.
