БИШКЕК, 16-янв. — Sputnik. Учак кулап түшкөн жерге биринчи вице-премьер Мухамметкалый Абулгазиев, өзгөчө кырдаалдар министри Кубатбек Боронов жана транспорт министри Жамшитбек Калилов жөнөп кетти. Бул тууралуу өкмөттүн маалымат кызматы билдирүүдө.
Ал эми ӨКМдин алдындагы өрткө каршы мамлекеттик агенттигинин өрттүн алдын алуу башкармалыгынын жетекчи орун басары Нурлан Ташмамбетов Sputnik Кыргызстан агенттигине учактын кыйрашынан чыккан өрттү өчүрүүгө 16 даана техника тартылганын айтты.
Эскерте кетсек, бүгүн "Манас" аэропортунан анча алыс эмес жерге Стамбулдан келе жаткан жүк ташуучу учак кулап түшкөн. Аэропорттун маалымат кызматы учактын кыйраганын тастыктап, "Түрк аба жолдору" авиакомпаниясына таандык жүк ташуучу учак Дача-Суу айылына жакын жерге кулаганын билдирген.
Кырсыктан эки үй өрттөнүп, жабыркагандар жана каза болгондор бар экени, экипаждын бир мүчөсү аман калганы белгилүү болгон.
