БИШКЕК, 10-ноя. — Sputnik. Картондо уктаган Искактын атасы телефон аркылуу байланышка чыккандыгы тууралуу аймактык кабарчыга баланын энеси Зульфия Усенова билдирди.
Анын айтымында, жолдошу кайра жарашалы деген сунушун айткан.
"Жолдошум үйгө келем деп телефон чалды. Бирок мен аны менен элдешпейм. Кыштын кычыраган күнүндө азаптуу күндөрдү кечирип жатканымда бир келип сурабай эми үйлүү болгондо пайда болуп калды", — деди Усенова.
Эскерте кетсек, сентябрда соцтармакта Ош облусундагы болжол менен Кара-Суу базарында картондун үстүндө уктап жаткан баланын сүрөтү талкууга алынган. Кийинчерээк баланын аты Ихсак экени, апасы Зульфия Усенованын төрт баласы бар экени аныкталган. Мындан сырткары, үй-бүлөнүн жашаган жери жана документтери жок болгону белгилүү болгон. Кийин балдарга мамлекет тарабынан документ тапшырылган. Эми президент Алмазбек Атамбаев үй-бүлөгө Кара-Суу шаарынан үч бөлмөлүү батир белекке берди.
