БИШКЕК, 7-ноя. — Sputnik. Ишемби күнү Чикагодо өткөн концертте америкалык опера жылдызы Николетта Раллис белгилүү композитор Муратбек Бегалиевдин "Сагындым" аттуу ырын аткарганын АКШда жашаган кыргызстандык Рамиль Мамырканов билдирди.
Уюштуруучулардын айтымында, иш-чара Кыргызстандын эгемендүүлүгүнүн 25 жылдыгына арналган. Анда белгилүү композитор Абдылас Малдыбаев, Калый Молдобасанов, Насыр Давлесов, Таштан Эрматов, Жылдыз Малдыбаева, Михаил Бурштин жана Муратбек Бегалиевдин чыгармалары жаңырган. Мындан тышкары Карамолдо Орозов, Атай Огонбаев жана америкалык композиторлордун чыгармалары аткарылды.
Мындан тышкары, америкалык аткаруучу Жонатан Левин, виолончелист Назгүл Бектурова жана комузчу Перизат Копобаева өнөрлөрүн тартуулашты.
"Мага абдан жакты. Ушундай концерттер көп-көптөн болуп турса", — деп Sputnik Кыргызстан агенттигине Мамырканов айтып берди.
Социалдык тармакка жайылган видеодо Раллисти кыргызстандык пианист Азамат Сыдыков коштоду. Бул ыр СССРдин Эл артисти Кайыргүл Сартбаеванын аткаруусунда таанымал.
