БИШКЕК, 14-окт. — Sputnik. Үстүбүздөгү жылдын 29-июлунда Орто-Сай айылында унаасы жарылып колу жулунуп кеткен прокуратура кызматкери Эркин Курманалиевге кол салууга шектелип кармалган жаран анын алыскы тууганы болуп чыкты. Бул тууралуу ИИМ билдирүү таратты.
Маалыматка ылайык, аталган кылмышка шектелип Бишкек шаарынын 36 жаштагы тургуну колго түшүрүлгөн. Анын үйүн тинтүү учурунда курал-жарак, ок-дары, жардыруучу түзүлүштөр, ок, гранат, Вепрь карабини, детонатор табылган.
Мындан тышкары, дагы бир нече курал-жарак менен бирге ИИМ башкармалыгынын мөөрү, курал алып жүрүүгө уруксат берүүчү актай бланкалар алынып, ал эми анын тууганынын үйүнөн Калашников автоматы алынган.
"Аталган жаран Курманалиевдин алыскы тууганы болуп чыкты", — деп айтылат билдирүүдө.
Учурда бардык топтолгон материалдар Башкы прокуратурага өткөрүлүп, тергөө уланып жатат.
