Microsoft 31 жылдан кийин 3D форматы менен Paint версиясын жаңылады

БИШКЕК, 10-окт. — Sputnik. Microsoft компаниясы 3D форматынын колдоосу менен Paint графикалык редакторун Windows 10 операциялык системасы үчүн иштеп жаткандыгын Вusiness Insider басылмасы жазып чыкты. 

Twitter түйүнүндөгү микроблогдо аталган функциянын жаңы мүмкүнчүлүктөрүн демонстрациялаган видео жарык көрдү.

​1985-жылдан бери өзгөрө элек Windows стандарттык программасынын жаңыланган версиясы аркылуу үч өлчөмдүү объектилерди түзүүгө мүмкүнчүлүк жаралат. 

Басылмадагы маалыматка караганда жаңыланган Paint версиясы Microsoft Surface планшеттик компьютерине багытталган. Бул боюнча компания тарабынан расмий билдирме тарай элек. Бирок басылма 26-октябрда өтө турган атайын иш-чарада Microsoft жаңы функцияны расмий жарыялашы мүмкүн экенин белгилейт. 

Microsoft Paint — 1985-жылдан бери бардык Windows операциялык системасында камтылган көп функциялуу графикалык редактор. Бул убакыт аралыгында программанын дизайны өзгөргөн эмес. Биринчи жолу Windows 7 версиясы үчүн кайрадан иштелип чыккан.