БИШКЕК, 5-окт. — Sputnik. Үстүбүздөгү жылдын аягына чейин 60 мектеп пайдаланууга берилет. Бул тууралуу өкмөттүн маалымат кызматы билдирди.
Архитектура, курулуш жана турак жай-коммуналдык чарба мамлекеттик агенттигинин директору Турдубек Мамбетовдун айтуусу боюнча быйыл өлкөдө 80 мектеп курулушу керек болчу, бирок ишке 20 мектеп гана берилип, калган мектептер жылдын аягына чейин бүтмөкчү.
"Муну менен мектепке муктаж болгон аймактардын маселеси чечилет", — деп билдирди Мамбетов.
Жыйындын жүрүшүндө өкмөт башчы өз убагында бардык зарыл болгон акча каражаттарын тиешелүү органдарга өз убагында бөлүүнү каржы министрине тапшырды. Архитектура, курулуш жана турак жай-коммуналдык чарба боюнча мамлекеттик агенттигине кийинки жылды пландаштырууда аймактардын муктаждыктарын эске алууну, ошондой эле бүтпөгөн долбоорлорду аягына чыгарууну тапшырды.
