БИШКЕК, 4-окт. — Sputnik. 30-августта Бишкектеги Кытай элчилигинде жардыруу уюштурган деген кине менен УКМК тарабынан издөөгө алынган Мубарак Турганбаев Кыргызстанга келүүдө. Бул тууралуу Турганбаев өзүнүн Facebook социалдык тармагындагы баракчасына жазып чыкты.
Белгилей кетсек, КРдин Улуттук коопсуздук мамлекеттик кызматы Бишкектеги Кытай элчилигинде жардыруу жасагандарга тийиштиги бар деген кине менен бир нече кишиге издөө жарыялап, айрымдарын камакка алган. УКМКнын берген маалыматы боюнча Кытай элчилигиндеги жардырууну Тажикстандын жараны жасаган.
"Буюрса акталып, тынч жашоого өтөйүн. Куру дооматтан кыска мөөнөттө кутулууну насип кыл, Аллахым. Сиздердин дуаларыңыздарды күтөм", — деп жазат ал.
Буга чейин Турганбаев Түркияга 2005-жылы келип, Стамбул университетинин эл аралык мамилелер факультетин аяктаганын айткан. Айтымында, ал төрт жылдан бери карго фирмасында иштеп келет. Турганбаев элчиликтеги жардырууга эч тиешеси жок экенин баса белгилеп, издөө салгыдай качып кетпегенин кошумчалаган.
