БИШКЕК, 29-сен. — Sputnik. Кийинки жылдын 1-октябрына карата 2,5 миллион ID карта электрондук биометрикалык паспортко алмаштырылат. Бул тууралуу Мамлекеттик каттоо кызматынын жетекчиси Тайырбек Сарпашев мекемеде өткөн жолугушуу учурунда айтты.
Сарпашевдин айтымында, жыл аягына чейин даярдык иштердин баары соңуна чыгат.
"Кийинки жылдын 1-октябрына чейин 2,5 миллионго чукул ID карталарды биометрикалык паспортко алмаштыруу пландалып жатат. Негизги иш жаңы жылдан тарта башталат. Албетте, мындай кыска аралыкта муну иш жүзүнө ашырууга мүмкүн эмес дегендер да чыгат, бирок биометрикалык маалымат чогултуу жараяны бизге чоң тажрыйба берди", — деди жетекчи.
Сарпашев аталган жаатта Каттоо кызматы жергиликтүү бийлик, район, облус администрациялары жана мэриялар менен тыгыз иш алып бара турганын белгиледи.
