БИШКЕК, 25-сен. — Sputnik. Атактуу бийчи Атай Өмүрзаковдун "Адем" бий тобу Италияда өткөн Tù Sì Que Vales (Сен татыктуусуң) конкурсунда калыстардын арзуусуну татыды. Кыргызстандык бийчилер залда отурган 100 көрүүчүнүн 98унун "макул" деген добушун алганын бий тобунун өкүлү Sputnik Кыргызстан агенттигине билдирди.
Анын айтымында конкурска алар июль айынын башында барып катышкан.
"Конкурск Рим шаарында июль айынын башында тартылган. Аны эми гана көрсөтүп жатат. Бизге анын жыйынтыгын эфирге чыкканга чейин жарыялоого уруксат беришкен эмес", — дейт топтун өкүлү.
Ал ошондой эле эгер залда отурган 100 көрүүчүнүн бардыгы тең "макул" деген добушун берсе, алар дароо эле финалга чыкмактыгын айтты.
"Эми жарым финалга барабыз", — деди ал.
Топтун жетекчиси Атай Өмүрзаков жарым финал октябрда болорун Sputnik Кыргызстан агенттигине билдирди.
Ал буга чейин өзүнүн Facebook социалдык тармагындагы баракчасына калыстар алардын бийин жогору баалаганын жазган.
Эске салсак, "Адем" бий тобу эл аралык "Чехия менен Словакия таланттарды издейт — 2016" конкурсунда калыстарды абдан таңгалдырып, финалга автоматтык түрдө өткөн.
Дүйнөнү дүңгүрөткөн Атай Өмүрзаковдун 10 ийгилигин Sputnik Кыргызстан материалынан окуңуздар>>
