БИШКЕК, 18-сен. — Sputnik. Индиянын премьер-министри Нарендра Моди Жамма жана Кашмир штаттарында 17 кишинин өмүрүн алган кол салууну кескин сынга алып, ага жоопкер адамдардын жазаланарын убадалады.
Бүгүн таңда куралчан согушкерлердин тобу Ури шаарындагы аскер батальонунун лагерине кол салып, куралдуу кагылыш бир нече саатка созулган.
We strongly condemn the cowardly terror attack in Uri. I assure the nation that those behind this despicable attack will not go unpunished.
— Narendra Modi (@narendramodi) 18 сентября 2016 г.
"Бул окуянын артында тургандар сөзсүз жазасын алат", — деп жазды премьер-министр өзүнүн Twitter баракчасына.
Буга чейин аскер кызматкерлери кол салгандардын төртөөнү жок кылганы айтылган. Армиянын маалыматы боюнча аскердик лагердин аймагына дал ушунча сандагы согушкер кирген, бирок учурда аларга тийиштиги бар адамдар да изделип жатат.
Элинин көбүн мусулман калкы түзгөн Жамма жана Кашмир штаттарында көз карандысыздык же Пакистанга кошулуу үчүн аракет кылган сепаратисттер абдан жигердүү болуп саналат. Кашмирде Индия менен Пакистандын ортосунда расмий чектин жоктугу да абалды бир топ оорлотуп келет. Эки өлкөнүн армиясын көзөмөл пункту гана бөлүп турат.
