БИШКЕК, 6-сен. — Sputnik. Кечээ, дүйшөмбү күнү Афганистандын борборунда катары менен үч ирет жардыруу болуп, кеминде 30 киши каза болгонун Khaama агенттигине таянуу менен РИА Новости билдирди.
Маалыматка ылайык, алгачкы эки жардыруу Кабулдагы Коргоо министрлигинин жанында эки жан кечти өзүн өзү жардырып жиберген. Андан күч түзүмдөрүнүн өкүлдөрү, ошондой эле президенттик күзөт кызматынын башчысынын орун басары Заман Ахмадзаи мерт кеткен.
Кеч курун өлкөнүн Ички иштер министрлигинин аймагында үчүнчү жарылуу болду. Алдын ала айтылган маалыматка караганда мында жардыруучу зат салынган унаа жарылып кеткен. Андан соң атышуу болгону да айтылууда.
Азырынча үчүнчү жарылуудан жабыркагандар боюнча маалымат жок.
