БИШКЕК, 29-авг. — Sputnik. Жогорку Кеңеш төрагасынын фондунан Москвадагы өрт кырсыгында каза болгон жарандардын үй-бүлөлөрүнө жардам иретинде бир миллион сом бөлүнөт. Бул тууралуу парламенттин сайтында жарыяланды.
Эскерте кетсек, 27-август күнү Москвадагы басмаканада өрт чыгып, анда иштеген Кыргызстандын 14 жараны каза болгон. Дагы үч жабырлануучу оор абалда ооруканада жатат.
Алардын сөөгүн алып келүү үчүн президент Алмазбек Атамбаевдин тапшырмасы менен учак бөлүнүп, анын бүгүн кечке маал Кыргызстанга учуп келиши күтүлүүдө.
Бүгүн, 29-августта Жогорку Кеңештин төрагасы Чыныбай Турсунбеков каза болгон жарандардын туугандары жана жакындарына ар тараптуу колдоо көрсөтүү маселесин парламенттик фракция лидерлери менен талкуулады.
