БИШКЕК, 27-авг. — Sputnik. Москва шаарындагы Алтуфьевск шоссесиндеги №5 имаратта жайгашкан басмакананын кампасында чыккан тилсиз жоодон адамдар каза тапты. Алардын 15и кыргызстандыктар болуп чыкты.
Sputnik Кыргызстан өрт боюнча хронологиялык типте маалыматтарды тизмектеп, канча кишинин өмүрү өчкөнүнө жана анын айтылып жаткан себептерине токтолду.
Кырсык саат канчада тооруган?
Москванын Өзгөчө кырдаалдар министрлигинин башкы башкармалыгынын берген маалыматында, өрт туурасында кабар эртең мененки 7:56да (ал кезде бизде 10:56 болчу) келип түшкөн. Өрт өчүрүүчүлөр окуя болгон жерге 5 мүнөттө барган. Тилсиз жоо 200 чарчы метрди каптаган. Алардын убактысы менен саат 9:51де (Бишкекте 12:51) өрт өчүрүлгөн. Буга 30 техника жана ӨКМдин 110 кызматкери тартылган.
Трагедиянын себеби эмнеде?
Россиянын Тергөө комитети Москванын Алтуфьевск шоссесиндеги басмаканада өрт электр лапмасынын зымдарынын кызып кеткенинен чыккан деп билдирди. Буга чейин атайын өрт коюлган деген кептер да тарап кеткен. Бирок, ал тастыкталган жок.
Каза болгондор жөнүндөгү жүрөк үшүткөн сандар
Алгач, көз жумгандар КМШнын 16 жараны деген кабар түшкөн. Кийинчерээк Москва шаарындагы өрт чыккан басмаканада каза болгондор Кыргызстандын жарандары экендигин Россиялык ӨКМдин Москва шаары боюнча жетекчиси Илья Денисов билдирип, окуяны чоо жайын айтып берди. Андан кийин ооруканадан бир мекендешибиз каза болду деген маалымат тарады.
ТИМ акыркы маалыматында баш-аягы болуп 17 киши курман болгонун, ал эми үчөө – бир аял менен эки эркек оор абалда ооруканада жаткандыгын айтты. Расмий түрдө көз жумгандардын 15и кыргызстандыктар деген жүрөк үшүткөн сандарды атады.
Көп өтпөй Москва шаарындагы "Кыргыз биримдиги" бирикмесинин жетекчиси Абдыганы Шакиров каза болгондордун көбү кыз-келиндер экендигин билдирди. Ал өрт Ош, Жалал-Абад жана Баткен облусунун тургундарынын өмүрүн алып кеткендигин айтты.
Трагедиянын чоо-жайы
РИА Новости куткаруучулар имараттын төртүнүч кабатындагы эс ала турган жайдан 16 адамдын күйүп жаткан денесин тапкандыгын кабарлады.
Тагдырлар
Күйүк алган кайнага, айылга кеткен келинчек, өрттө калган кош бойлуу аял. Бизге сүйлөп берген Москвада жашап жаткан жаран атын атагысы келбей, бирок, өрттөн боюнда бар кыргызстандык келин каза болгондугун билдирди. Ал аталган басмаканада 9 жыл эмгектенип, кийин башка ишке которулуп кеткенин, акыркы мезгилде аялы жана кайнагасы иштеп жаткандыгын айтты.
"Жакында эле аялымды Кыргызстанга жөнөтүп жибергем, ал эми кайнагам азыр шок абалда, денесин көпчүлүк бөлүгүн күйгүзүп алыптыр", — деди.
Кубатбек ишке кечигип келип, ажалдан аман калган. Бизге ал жигит эрте келгендер өрттү көрбөй калып, имаратка кирип кетишкендигин, ал эми жалын заматта күчөп, шахтанын лифти менен башка кабаттарды каптагандыгын айтты. Бирок, ал карап туруп албай, өрттүн ичине кирип барып, эс ооп калган аялды эшикке алып чыгыптыр.
Бийлик эмне деди?
Москванын мэри Сергей Собянин каза болгондордун жакындарына көңүл айтты. Ал эми Тергөө комитети кылмыш ишин козгоду.
Премьер-министр Сооронбай Жээнбеков өрттүн чоо-жайын иликтөө боюнча тышкы иштер министри Эрлан Абдылдаевге жана ИИМ башчысы Кашкар Жунушалиевге тапшырма берди.
Кыргызстандыктар каза болгон Москва трагедиясынын сүрөттөрүн бул жерден көргөндө жүрөк кайрадан канайт.
ТИМ жаракат алып ооруканага түшкөн жарандардын атын-жөнүн кабарлады.
Ал эми каза болгон мекендештердин толук аты-жөнү, кара тизме азырынча белгилүү боло элек.
