БИШКЕК, 29-авг. — Sputnik. Москвадагы кыргыз жарандарынын өмүрүн алып кеткен өрт боюнча тыкыр иликтөө жүрөт. Бул тууралуу Россиянын тышкы иштер министри Сергей Лавров Кыргызстандын тышкы иштер министри Эрлан Абдылдаев менен телефон аркылуу сүйлөшүп жатып айтканын аталган ведомство билдирди.
Маалыматта билдиргендей, Лавров өрттөн каза болгон 14 жарандын тууган-туушкандарына көңүл айтып, бул боюнча иликтөө иши кылдат жүргүзүлүп, күнөөлүүлөр сөзсүз жазаланарын белгилеген.
Абдылдаев өз учурунда кесиптешине колдоо көрсөткөндүгү үчүн ыраазычылык билдирип, аталган жагдай аягына чейин иликтенип, ачыкка чыгарына ишенерин билдирди.
Эскерте кетсек, 27-августта Кыргызстан үчүн эки ири кырсык болуп өткөн. Москвадагы өрттөн каза болгон 14 кыз-келиндин жана Ош — Бишкек жолунда автокырсыктан 9 адамдын өлүмүнө байланыштуу Кыргызстанда аза күтүү күнү жарыяланган.
