БИШКЕК, 28-авг. — Sputnik. Британиянын премьер-министри Тереза Мэй шаршемби күнү өлкөнүн Евробиримдиктен чыгуу — Brexit процедурасы боюнча өкмөттүк жыйын өтө турганын РИА Новости Press Association агенттигине таянуу менен жазып чыкты.
"Мында Мэй тийиштүү ведомство жетекчилеринен биримдиктен чыгуу боюнча көрүлүп жаткан чаралар тууралуу сурары күтүлүп жатат. Жыйын шаршемби күнү премьердин шаар четиндеги резиденциясында өтөт", — деп айтылат маалыматта.
Мындан тышкары, премьер башка өлкөлөрдүн лидерлери менен соода жаатындагы макулдашуулар боюнча сүйлөшмөкчү.
Эскерте кетсек, июндун соңу менен Улуу Британия Евробиримдиктен чыгуу үчүн добуш берип, бирок Шотландия уюмда калуу чечимин билдирген. Мындан кийин премьер-министр Дэвид Кэмерон кызматынан кетүүгө аргасыз болгон.
